SECUREX KAZAKHSTAN 2025 ДРОНДАР, ИННОВАЦИЯЛАР ЖӘНЕ КИБЕРҚАУІПСІЗДІК САЛАСЫНДАҒЫ СИНЕРГИЯ АЛАҢЫНА АЙНАЛЫП, САЛАНЫҢ ЖЕТЕКШІ КОМПАНИЯЛАРЫН БІРІКТІРДІ
2025 ЖЫЛДЫҢ 12-14 НАУРЫЗ АРАЛЫҒЫНДА АЛМАТЫ ҚАЛАСЫНДА «ҚАУІПСІЗДІК, ӨРТТЕН ҚОРҒАУ, АҚПАРАТТЫҚ ТЕХНОЛОГИЯЛАР, БАЙЛАНЫС ЖӘНЕ ДРОНДАР» SECUREX KAZAKHSTAN 2025 ХАЛЫҚАРАЛЫҚ КӨРМЕСІ СӘТТІ ӨТТІ.
Бұл шара қауіпсіздік саласындағы озық технологияларды көрсету және өзекті мәселелерді талқылау үшін маңызды платформа екенін тағы да дәлелдеді. Көрмеге бизнестің, мемлекеттік құрылымдардың, салалық сарапшылар мен кәсіпқойлардың қатарынан 1 585 бірегей келуші қатысты. Қатысушылар ұйымдастыру деңгейінің жоғары екенін, қатысушылардың әртүрлілігін және экспозицияның үнемі жаңартылып отыратынын атап өтті: «Мен бұл көрмеге алтыншы рет келіп тұрмын, және әр жолы ол тек оң әсер қалдырады. Іс-шара жоғары деңгейде ұйымдастырылған және көптеген қызықты компаниялар ұсынылған. Әсіресе, экспозицияның үнемі жаңарып, жаңа қатысушылардың, соның ішінде Қытайдан келген компаниялардың пайда болуы қуантады», – деп «Advance Systems» компаниясының инженер-интеграторы Ярослав Рыков өз ойымен бөлісті.
Көрменің экспозициясы инновациялық шешімдердің кең ауқымын ұсынды. Іс-шараға 8 елден: Қазақстан, Беларусь, Германия, Қытай, Ресей, Түркия, АҚШ және Оңтүстік Кореядан 65 компания қатысты. Қатысушылар өз стендтерінде қауіпсіздік индустриясының негізгі бағыттарын қамтитын технологияларды таныстырды. Олардың қатарында физикалық және периметрлік қорғаныс, бейнебақылау және қол жеткізуді бақылау жүйелері, киберқауіпсіздік, өрт қауіпсіздігі, сондай-ақ ұшқышсыз жүйелер мен дрондарға қарсы технологиялар бар.
Қатысушылардың жалпы санының 42%-ын құраған дебютанттар көрмеге ерекше серпін берді. Олардың қатарында All Prof-Telecom, Almavikon, AP Sensing, Arti Group, Геоскан-Казахстан, NewTech Distribution және басқа да компаниялар бар. Бұл компаниялар индустрияның негізгі бағыттарына жаңа көзқарас ұсынып, даму үшін жаңа бағдарлар белгіледі. Экспоненттер көрменің іскерлік байланыстарды нығайту және тәжірибе алмасу мүмкіндіктерін жоғары бағалады: «Біз үшін мұндай форматтағы іс-шараға қатысу – алғашқы тәжірибе. Бірақ біз көптеген жағымды әсер алдық, бизнесімізді дамыту үшін жаңа инсайттарға ие болдық және серіктестік қатынастарды дамытуға арналған көптеген жаңа байланыстар орнаттық», – деп «INOVA TECH» ақпараттық қауіпсіздік қызметтері тобының жетекшісі Асхат Ахмадиев бөлісті. Осы пікірді «ALL PROFTELECOM» компаниясының сату менеджері Роман Хакимов та қолдап, былай деп атап өтті: «Біз өте маңызды және қызықты адамдармен, компаниялармен таныстық, жаңа серіктестер таптық, қызықты келісімдерге қол жеткіздік. Көрме – нағыз кәсіпқойлардың шоғырланған ортасы».
Көрменің ерекше назар аударған бөлімі – алғаш рет ұйымдастырылған DronEx Kazakhstan 2025 аймағы болды. Бұл экспозицияның қатысушылары ретінде Геоскан-Казахстан, БизнесИнжиниринг, CLEVEREST, D-FEND, VODOPAD, R&D Center Казахстан Инжиниринг компаниялары ұсынылды. Келушілер дрон технологиялары саласындағы соңғы әзірлемелермен танысып, олардың мүмкіндіктерін бағалауға мүмкіндік алды. 8-павильонда орналасқан бірегей дрон аймағы тек жаңа технологияларды көрсету орны ғана емес, сонымен қатар интерактивті алаңға айналды. Көрме қатысушылары мен келушілері дрондарды симуляторларда басқару, дрон-футбол ойнау және Micro-FPV дрондарымен қызықты жарыстарды тамашалау мүмкіндігіне ие болды. DronEx Kazakhstan 2025 қатысушылары көрмеге қатысудың табысты тәжірибесімен бөлісті: «Біз дрондарды геодезия және геофизика саласында қолданамыз. Біздің стендке көптеген адамдар келіп, жобаларға қызығушылық танытты, байланыс деректерімізді алып, болашақта ынтымақтастық орнатуды жоспарлап отыр», – деді «Business Engineering» компаниясының геодезисі Сатмағамбет Қашенов.
Көрменің іскерлік бағдарламасы 4 конференция мен 2 семинардан тұрды, онда 27 спикер сөз сөйледі. Бұл іс-шаралар сала мамандарының, мемлекеттік органдар мен салалық қауымдастықтардың өкілдерінің назарын аударды. Инновациялар, киберқауіпсіздік, өрт қауіпсіздігі, ұшқышсыз технологиялар, деректерді қорғау және практикалық шешімдер тақырыптары көрменің іскерлік бағдарламасының басты бағыттарына айналды. Бұл мәселелер бірқатар маңызды іс-шараларда талқыланды, соның ішінде «Қазақстандағы өрт қауіпсіздігін қамтамасыз етуге арналған инновациялар мен инфрақұрылымдық шешімдер» Пленарлық отырысы, «Қазіргі әлемдегі дрондар: технологиялар, қауіпсіздік және практика» І DronEx 2025 конференциясы, «Securex Talks: Күрделі инфрақұрылымдардың киберқауіпсіздігі: табиғи VS жасанды интеллект» панельдік сессиясы, сондай-ақ «Securex Practice: Іске асыру бойынша практикалық кейстер мен мәселелер» сессиясы. Сонымен қатар, TP-Link және Suprema компаниялары қатысушылар мен келушілер үшін арнайы семинарлар өткізді. Көрменің соңғы күні DronEx Kazakhstan аймағында Micro-FPV дрондарының финалдық жарыстары және жеңімпаздарды марапаттау рәсімі өтті.
Securex Kazakhstan 2025 тағы да жоғары деңгейде ұйымдастырылды, ұсынылған шешімдердің өзектілігін және салалық күн тәртібінің маңыздылығын көрсетті. Іс-шара кәсіби диалог, іскерлік байланыстарды нығайту және озық технологияларды таныстыру алаңына айналып, қауіпсіздік саласындағы жетекші іс-шара ретіндегі рөлін растады.
Іс-шараның ұйымдастырушылары – Қазақстандық «Атакент-Экспо», «Iteca» көрме компаниялары және оның халықаралық серіктесі ICA Events компаниялар тобы.
Көрменің Бас серіктесі – ЭГИДА GROUP.
Бас ақпараттық серіктес – RUБЕЖ журналы.
Жобаны Қазақстан Республикасы Төтенше жағдайлар министрлігі, Қазақстан Республикасы Ішкі істер министрлігі және Алматы қаласының әкімдігі ресми түрде қолдады.
